بس يا ولد عيب

العيب

العيب دى كلمه بنسمعها كتير اقوى فى حياتنا اليوميه وهنتكلم عنها باستفاضه انهارده

المعنى الحرفى لكلمه العيب فى قاموس المصرين: ان دى حاجات مينفعش نعملها والا هنتعاقب اوالناس تبصلنا بصه مش هى وكده يعنى

المغذى اللغوى عند المصرين: دى كلمه هما اخترعوها واقعدو يكبروها لغايه مابقو بيخافو منها حاجه كده زى ابو رجل مسلوخه وامن الغوله اللى ملهمش وجود اساسا وما زال فى ناس بتخاف منهم

دلوقت هنرغى كالعاده

العيب زمان

المصرين كانو بيخترعو الكلمه دى علشان يستخدموها فى الحد من التقليد والعادات الاخلاقيه الغير مرغوبه ولغايه حد معين كان الموضوع مقبول وكان كل شىء تمام والناس مكانتش بتعمل حاجه عيب ولا كانت بتخالف التقاليد والعادات الغير مستحبه

العيب دلوقتى

لكن لما بدات الكلمه تكتسب شعبيه ويكون ليها معنى مسموع وسلطان قوى على تصرفات الناس بدا المصرين ان هما يستخدموها لارضاء اهوائهم بمعنى ان اى حد بداء يشرع العيب على مزاجو يعنى مثلا الاب يقول للابن عيب تلعب مع فلان ليه من غير ليه هو عيب وخلاص والام تقول لبنتها عيب تكلمى فلانه هكذا اصبحه الكلمه ده خضعه لاهواء اللى عندهم سلطه البت فى المواضيع زى الام والاب والمدرس وكدا يعنى

دى مصايب مش عيب

المشكله دلوتى بقت فى المجتمع بمعنى ان الناس بقت بتخاف من المجتمع وكأنو حاكم الكون يعنى الواحد لوعايز يعمل حاجه وهو عارف ان هى حلال ومفهاش مشاكل بس المجتمع شيف الحاجه دى عيب هو مش هيعملها ولو فى حاجه اساسا حرام والمجتمع شايف ان هى عادى هتلاقيه اول واحد بيعملها وطبعا الامثله كتير وانتو عارفنها

حاجات العيب بريء منها ولازم تتغير

يعنى من اللى قال ان الست المطلقه عيب وينفعش الوحده تطلاء من جوزها

لا الاحسن ان هى تفضل عيشا معاه حتى لو بيمسح بكرمتها الارض

طب لما هو كدا انشا الله ربنا كان حلل الطلاق ليه

ومن اللى قال ان البنت لو عدت سن ال26 ومكانتش مجوزه يبقى عنست

ثم ايه معنى عنست دى طبعا الموضوع ده بيخلى كل افراد العيله تجرى فى الموضوع ده من اول لما البنت تم 18 سنه وبما فيهم البنت بتلحق توقع لها ولد لقطه لحسن تعنس

طبعا الحاجات دى مش موجوده غير فى قاموسنا احنا بس فيها ايه لو البنت متجوزتش خالص حتى ومفيش حاجه اسما تعنس ولااحنا لازم نحرق دم الناس

ضل راجل ولا ضل حيطه وهو راجل والسلام

دى العباره اللى نا بسميها هادم الامال يعنى دى العبارة اللى بتتقال لاى بنت كبرت شويه فى السن حصل لها ظروف لما يجلها عريس نص لبه وعلى العباره دى بتتحطم سفينه احلام البنت المسكينه اللى مجتمعها حكم عليها بعقول مصديه ورجعيه ومتخلفه

انا بقى بقولها ضل حيطه

الراجل مينفعش يتجوز واحده اكبر منه

ليه بقى انشا الله هى هاتكله ثم فلنفرض انه حبها يروح ينتحر علشان المجتمع وعجبى

حاجه من الحاجات اللى لازم تتغير هى نظرت المجتمع للمراءه على انها اداه لاشباع الغرائز وتابلو جميل لازم يتحط فى بيت راجل علشان هى لا زم تكون فى حمايه الراجل مع العلم ان فى ستات بمئه راجل لازم المجتمع يبداء يعامل المراءه على انها كأن قائم بذاته ليه مشاعر واحاسيس وعواطف وعقل واراده واحلام وطموحات بس مش على مستوى الشغل والمناصب لانهم تقريبا خدو حقهم وزياده لكن على مستوى العادات والتقاليد لسه محصلش