Wednesday, August 8, 2007
شرابى مخروم
شرابى مخروم وحالى معدوم بس مش مهموم وجيبى فاضيان بس مش قرفان بامشى بين الناس وادفى نفسى بالاحساس اللى خارج من قلوبهم واجرى ورا الاتوبيس واتشعبط فى الميكروباص واسطعبط ومادفعش فى المترو واجرى فى وسط الشارع وازعق بصوت عالى بحبك يا مصر وامشى لواحدى باليل افتكر الليالى الخوالى والجميل اللى كان شاغل بالى وابدا اتملى هموم اقرر اقوم واجرى ومن فوق الكوبرى ارمى كل الهموم للنيل واقوله خاليها ومطلعهاش واروح استخبى بين الناس واساعد واحد بيعدى الطرق واواسى واحد فقد صديق وادل واحد تايه على الطريق واضحك لطفل بيلعب على كتف مامته واقولو بعنيا لازم تحب مصر واجرى واشوط الكره للشباب اللى بتلعب فى الشارع ادام الجامعه واقلهم فى سرى بكره مصر احلى واقوم واقعد الراجل العجوز فى الاتوبيس واقوله ياجدو الدنيا كلها خير واشيل للست المشنه من فوق راسها وانزلهالها واقولها اى خدمه يا امى وتقولى رابنا يخاليك يابنى اقول فى سرى يخالينى بس يخالينى لمصر وارجع لبتنا اللى مستخبلى بين البيوت واجرى على السلم وانا بقول لاوضتى واحشتينى وبسرعه افتح الباب واترمى على سريرى واحضن مخدتى وابص لشرابى الاقيه مخروم اقول مش مشكله طالما انى مش مهموم
Subscribe to:
Post Comments (Atom)
4 comments:
لو انت كاتب الكلام ده
اسمحلي احييك
استاذ استاذ
كلام جامد مووووت
اولا يا استاذ محمود الف شكر على تواجدك فى مدونتى المتوضعه دى ثانيا اشكرك على التعليق الجميل ده ثالثا انا والحمد لله عمرى ما حطيت حاجه فى المدونه الا اذا كنت انا اللى كاتبها ولو مش انا اللى كاتبها بنسبها لصاحبها حتى لو معرفوش
حلو أوى البوست دا يا مصراوى ماشاء الله الكلام جامد بجد
rabena y5aleky ya maro de shehada a3taz beha fe el modawena el motawad3a de
Post a Comment