Tuesday, July 14, 2009

عـشـان انـت مـصـرى

مش هنكتب شعر لان احمد فؤاد نجم قال فى الموضوع ده كلام مفيش اجمل منه لكن شويه نصايح كده على الماشى
عشان انت مصرى
(داخل مصر)
لو انت واقف فى طابور طويل ملوش اخر مستنى تاخد لقمه عيش وجيه واحد قريب حد بيشتغل فى الفرن وخد عيش ومشى وساعتك واقف بقالك تلت اربع ساعات عادى اعمل نفسك مش واخد بالك

لو ساعاتك رحت تخلص ورق من اى مصلحه حكوميه ولقيت المدام او الاستاذ بيفطر بيحل كلمات متقاطعه بتعمل الطبيخ عادى امشى وتعالى بكره هى الدنيا هتخرب

لو ساعاتك بتلف بقالك ساعه علشان تركن عربيتك ولقيت واحد غمز العسكرى خمسه جنيه وركن صف تالت يا تعمل زيه يا تكمل لف وربنا معاك

لو ساعاتك راكب المترو ولقيته فوت محطه ولا ومحطتين عادى يا سيدى جل من لايسهو انزل وغير واهى فسحه بردو

لو ساعاتك راكب اتوبيس ولقيته غير مساره علشان يروح يجيب العيال من المدرسه او يفوت يجيب فطار متدايقش ولا عايز العيال ميرواحوش فى اتوبيس بابا اما امرك غريب

لو ساعاتك واقف فى اشاره ولقيت عربيه بنمر سوده او عليها نسر ده معناه ان اللى راكب العربيه دى ياعينى تعبان ومش بيفهم ياعنى ايه قانون ياعنى ممكن يكسر الاشاره ومحدش يكلمه اقولك ادعى له ربنا يشفيه

لوساعاتك واقف مع عشرين تلاتين الف واحد رايحين تقدمو على وظيفه ومره واحده لقيت حد بيقول ان الوظيفه اتشغلت من غير ما يعملو انترفيو مع اى حد تتاكد ان الحكومه عندها بعد نظر وعرفو ان الشغلانه دى مش مناسبه لسعادتك واوعى دماغك تروح كدا ولا كدا
اخر معلومه على الماشى كدا فى مبانى مكتوب عليها اقسام بوليس دى عباره عن مبانى عملنها علشان الظباط يريحو فيها اعصابهم ويستجمو فا ياريت بلاش تقرب من هناك علشان الناس دى زعلهم وحش قوى ولو مش مصدق روح وانت تعرف
ولو سعادتك مصرى
(بره مصر)
اولا علشان نبقى متـفقين من الاول اى واحد مصرى بره بيبقى عامل نفسه من كوكب تانى لما يقابل واحد مصرى زيه وانتوا اكيد فاهمين
لو ساعدتك اول لما نزلت البلد الغريبه وقابلت واحد مصرى وعمل عليك مصلحه ايه المشكله ابن بلدك واهى لما تيجى من القريب احسن ما تيجى من الغريب
لو ساعتك شديت رجلك لحد السفاره المصريه فى اى بلد زيها زى اقسام البوليس هنا بالظبط البعد عنها غنيمه ومش بعيد يرحلوك لمجرد انك فكرت تروح السفاره اصلا
لو ساعتك حصل معاك اى مشكله بره مع اى جهه حاول تسويه ودى حتى لو هاتيجى على كرامتك حبتين لان بالعربى لو وصلت للمحاكم مش هتاخد حقك خالص بس اكيد اكيد هتاخد بالجزمه
ولوالمحكه حكمتلك مش هتلحق تاخد حقك هتتقتل وهنا بقى يجى دور السفاره الوحيد وهو ارسال جسمانك الى الاراضى المصريه
لو سعادتك عالم ووصلت اسر خطير بلاش تخدك الجلاله وتقول ارجع بلدى لان ببساطه اول ناس هتبيعك هى بلدك والامثله معروفه علشان
محدش يعمل نفسه مش واخد باله
واخيرا لو سالتك انت مصرى تقولى ايه

2 comments:

Mariam Galal said...

هاقولك مصرى وابن .... يعنى تفتكر هاقولك ايه يعنى
بص انت معاك حق
بس لو سألتنى فى الأخر انت مصرى ولالا
هاقولك مصرى
ولو اتريقت .. احتمال اكلك بسنانى
ده فى حاله ما تكون مش مصرى زيى أهو علشان هيا بلدى ولو كوم زباله ولو مؤاخذه مسمحش لحد يهينها
ولو بقه انت شخص مصرى زيى
هيكون ردى
لو لو أكن مصريا .. كنت هابقى مستريح نفسيا

masrawy 3'alabawy said...

للاسف ده الواقع لكن مش اسف علشان انا مصرى واكيد اسف علشان ده بيحصل جوه وبره مصر وكل ذنبى انى مصرى