أمة متخلفه بالوراثه

(الجزء الاول )

نحن أمة ذكوريه متخلفه بالوراثه

.......والدليل قالولو

اللى مش عاجبه الكلام ده يجوابنى على كام سؤال كدا

ليه الراجل بس هو اللى من حقه يقول عايز اتجوز والبنت لما تقول عايزه اتجوز تبقى قليله الادب ؟

ليه الراجل بس هو اللى من حقه يقول اتجوز دى ومتجوزش دى والبنت لو جالها اى بنى ادم لازم توافق عليه والا اهلها هيخلو عيشتها سوده؟

ليه الراجل بس هو اللى من حقه يطلق والست لما تطلب الطلاق تبقى عملت جريمه لا تغتفر؟

ليه ضل راجل ولا ضل حيطه؟

ليه الست لو زنت تتقتل والراجل لو زنا يقولو المسامح كريم ومش هيعمل كدا تانى مع ان ربنا سبحانه وتعالى شرع عقوبه واحده للراجل والست فى نفس الواقعه؟

ليه الراجل لو قعد فى بيت ابوه بعد الكليه خمس عشر سنين من غير شغل محدش بيقوله "بم " لكن البنت لو خلصت كليه واشتغلت وبقت ناجحه فى الشغل لزم نقرفها انتى هتتجوازى امتى انتى هتفضلى قعدنا كدا؟

وليه

وليه

وليه

وميت الف ليه

pause

لحد هنا و

pause

كل حاجه لحد هنا و مينفعش خالص اللى بيحصل ده مش هنغانى ونقول عواد باع ارضه ياولاد شوفو طوله وعارضه يا ولاد ولا هانقول

A7A

على سبيل الاعتراض ونسكت بعد كدا لكن لزم نقف وقفه رجاله يمكن مش علشانا المره دى لكن علشان كل مصرى هيتكتب عليه انه يشيل فى بطاقته كلمه مصرى فى خانه الجنسيه علشان كل اللى هايجى بعد كدا علشان لو موقفناش المره دى مش هاينفع يكون لينا صوت تانى لان ساعتها هنبقى بعنا حقوقنا وبعنا نفسنا وبلادنا كمان "اداره الاصول المملوكه للدوله" الاشتغاله الجديده اللى بيتكلم عليها اليومين دول واللى فيما معناها هيبيعونا بلدنا بالاونطه ويدو كل واحد عضمه فى ايده ويقولوله هو ده حقك من البلد دى منسمعش صوتك تانى ولا تامين بقى ولا امول عامه ولا ملكيه عامه ولا دعم ولا وجع دماغ زمان كنا بنغانى ونقول وشرفك يا بلدى سحابه وتعدى وبردو انتى بلدى لكن لو سكتنا المره دى ازاى هنقولها انتى بلدى واحنا سبناهم يبيعوها ويقسموها وطبعا بالنسبه للقسمه هتبقى على مزاج اللى هيقسم ياعنى المقربون والناس الكبار هايخدو الاسهم بتاعتهم فى الشركات الجامده وانتو عارفين قصدى وطبعا اللى ملوش ضهر فى البلد دى هياخد الاسهم بتاعته فى كوبرى اكتوبر او شركه الصرف الصحى وهكذا ثم ان انتا لما تيجى لواحد غلبان ميعرفش من الدنيا غير انه بيشتغل اليوم بيومه وتيجى تقولو انه هيبقى عانده اسهم وارباح كل سنه وبتاع بس ملوش الحق بقى فى التامين الصحى ولا هيبقى فى دعم ولا الكلام ده هو هيبقى ايه رد فعله ولا نفكر فيه ليه هى الحكومه تعرف اصلا حاجه عن الطبقه دى هو واضح كدا من الاخر ان الحكومه عايزه تخلع من الشعب فقالو نفهمهم ان هما خدو حقهم علشان مش كل شويه يقرفونا بقى ويقولو فرص عمل ودعم وتامين وحاجات كدا من اللى بتصدع الحكومه وهو طبعا حل ممتاز يخرجهم من الازمه دى وخصوصا ان الشعب دلوقتى فى الطراوه ولا حد فاهم حاجه وكل القرارات بيتوافق عليها ومحدش فاهم حاجه فا قالو فى الضلمه كدا وكله غايب عن الوعى نبايعهم بلدهم ونمضيهم على كدا علشان منسمعش صوتهم تانى ادينا عملنا اللى علينا وكتبنا واجرنا على الله

اه يا زمان التواهان

يا باب يا مقفول ... إمتي الدخول
صبرت ياما و اللي يصبر ينول
دقيت سنين ... و الرد يرجع لي : مين ؟
لو كنت عارف مين أنا كنت أقول
عجبي

!!!

اه ياعم جاهين محدش عايز يقولى انا مين

سالت كل شى حوليا لم جوبنى

وعجبى عليك يا زمان

ياللى الانسان ميعرفلوش فيك عنوان لنفسه

ولا حتى يعرف اسمه

تايهين جوانا مش لاقين ضى يدلنا على السكه بكسر السين

اقولك يدل مين يا عم دا احنا بقينا فى زمن سكه بفتح السين

يا فندى يا بيه

يا فندى يا بيه
انتا مدرتش ولا ايه
بلدنا اصبح بيحكمها الجنيه
لا تقولى دستور ولا معرفش ايه
وسلطه علينا حطه بلاوى ومصايب
وخربت يا بيه
بعد ما بلدنا حكمها الجنيه
ودا يجى ايه جنب الوسطه والمحسوبيه
ونايب فى المجلس ونيبه ورزيه
وعشان عياله يسرب امتحان الثانويه
ويكسب قضيه
هو فيها مجرم امال ايه
مش اسمه نايب يا بيه
وابنه طايح فى الخلايق
يمين شمال وفى بقه لبانه
انتا متعرفش انا ابن مين
وخربت يا بيه
بعد ما بلدنا حكمها الجنيه
ويرتها على اد كدا
كنا شلنا المجلس ومنعنا النيابه
بس المشكله مش فيهم المشكله فينا
احنا الغلابه عيشين فى غابه
وسط الديابه وهنعمل ايه
والباشا لو ظابط وحاطط الزبليت
على الكتفين
لزم تعظم وتسمع كلامه
صح غلاط مش دى القضيه
القضيه ان لكلامه لازم تسمع
ولو لزم الامر لازم تطاطى
وتعيش فى حالك طب وانتا مالك
ومال الحاجات دى
دانتا غلبان
وبتبات جعان
اكمن اللى جى مش اد اللى رايح
والعيال كتير والهم الكبير
فى الواد الكبير
اللى خلص علامه
وقام وقال اشتغل يابا
وبما انك مفيش لاوسطا
ولا ليك قريب فى السلطه
وقفت عاجز ومعرفتش ترد
هاتقولو ايه
بعد ما خد شهاته وطالع بامتياز
هتقولو ايه
اقولك قوله بلادنا يابنى
خربت بعد ما حكمها الجنيه ومعاه الكارنيه
وابوك فقير
وعمره فى يوم ما كان غنى
ولا عمره فى حياته شال كارنيه
وخربت يا بنى بعد ما بلدنا حكمها الجنيه

هندون عن ايه ونكتب ايه

هندون عن ايه ونكتب ايه............... كل حاجه حولينا محتاجه كلام الدنيا كله علشان يوصفها كنا ممن نكتب عن رغيف العيش و نشتكى شكله ولونه وريحته وحجمه بس لو هو المشكله بردو ممكن نكتب عن الميه ونلعن الزحمه ونشتم الرشوه والتوصيه والوسطه ومفيش مانع لو اتكلمنا عن الاجور ومعدومى الدخل وتسمم الاكل ولحم الحمير والكلاب ومش عارف ايه وابصر ايه ويمكن كمان نتكلم عن مجلش الشعب واللى انا بقول ياعنى مجازا ترزى القوانين الحكومى ومفيش مانع نجيب سيره البطاله بس المشكله مش فى ده كله المشكله ان احنا عرفين المشكله وشيفنها بتكبر كل يوم عن اللى قبله وبنغمض عنينا ونمشى ونقول وانا مالى طب لما هو مش مالى ولا مالك ولا مال اى حد امال مال مين

كله ماشى

بس هنا يا عم كفايه كدا نزل كل حاجه وارفع يافطه واحده مكتوب عليها

كله ماشى

قولنا هنعمل اضراب والاضراب ضرب مننا وكله ماشى بس مش عشان احنا ماضربناش ولا موصلناش!لا ابدا اصل احنا نفخنا فى قربه مقطوعه الشعب مات ومش عايز اضراب علشان ناخد حقنا ونعبر عن راينا ويتسمع صوتنا لا الشعب عايز تلاجه ايوه تلاجه نقل الموتى علشان الشعب دماغوا ماتت وعفنت وبقى مش شايف ولا حاسس باى حاجه وكله ماشى شباب وشيشه وكوتشينه وتحشيشه كله ماشى بنات وخروجات وتليفونات وباترينات وكله ماشلى عواجيز و صبغه وحرميه بردو ويمكن ضحيه بس سايب حقه وكله ماشى رجال اعمال وغسيل اموال ولعب بقوت الغلابه وكله ماشى بيع ميادين وبنادمين وكام مبنى قديم وكله ماشى ضرب على القفا وشتيما مقرفا من شويه عساكر وحركات فى الخفى وكله ماشى شوراع وزحمه ومافيش اغلى من اللحمه وفراخ وبيظه وكله ماشى العيش مش لاقينوا والجوع مش طيقينوا الزرع ومسرطنينو وكله ماشى ضرايب وبتزيد واجور فى الحضيض وكله ماشى وسلملى بقى على الشعب المجيد وباب الحديد
وكله ماشى

فينك يا عم صلاح

نوح راح لحاله و الطوفان استمر
مركبنا تايهه لسه مش لاقيه بر
آه م الطوفان وآهين يا بر الأمان
إزاي تبان و الدنيا غرقانه شر
عجبي !!